Kev Pam Tuag

• Lub Ntees:

           Vim ib tus neeg twg ua lub neej nyob nws muaj lub zoo neej ua, muaj koob muaj npe, muaj tub muaj ki, ua nom ua tswv los yog nws ho tsis tau lub neej zoo li lub siab xav thiab lub siab ntshaw. nws nyob muaj tsoom tub tsoom kiv, muaj neej tsa thiab txheeb ze. Yog li ntawv, thaum nws tag lub neej txoj sia lawm tej tub kiv thiab cov kwv tij thiaj yuav tsum tau ua ib lub zoo ntsees pauj nws tej kev zoo tag los, kev ntshaw, kev noj kev haus, thiab lub siab tshua txog nws tsoom phooj ywg sawv daws ua hnub kawg ntawm nws lub neej mus tag ib sim.

• Txiv Taw Kev:

           Peb ua neej nyob ua ntej yuav muaj yus los yuav tsum yog muaj yus niam yus txiv, yus pog yus yawg thiab poj koob yawm txwv thiaj muaj los txog yus. Yog thaum ib tus twg tag sim neej lawm yuav muaj tus taw kev tuaj taw nws txoj kev rov mus cuag nws pog nws yawg uas tag sim neej lawm thiab taw nws kev mus nqa nws lub tsho tsuj tsho npuag (tsho menyuam) uas thaum yug nws es nws thiaj yuav rov mus thawj thiab ua neeg tshiab tau lawm tom ntej.

• Txiv Cuab Tsav:

           Yog thaum ib tug neeg twg tag sim neej lawm, yuav tau thov ib tug kwv tij kom yog tys tag sim neej ntawv phaj los ua tus ntoj dab tu qhua los yog tus txiv coj dab ntawm lub ntees. Nws yog tus los laig zaub mov, dej caw, tsiaj txhu thiab xyab ntawv rau tus tuag.

• Txiv Qeej Txiv Nruas:

           Thaum ib tug neeg tag sim neej lawm, nws muaj tus txiv qeej tuaj tshuab qeej txuas tus tuag lus, taw nws kev, cob tshais cob su thiab hmo rau nws noj. Tus txiv nruas yuav tuaj ntaus lub nruas ua pag ua xau ua kev lom zem rau nws ua zaum kawg ntawm nws lub neej.

• Txiv Kav Xwm:

           Txiv kav xwm yog yuav tuaj nrog lis kev txheeb kev ze, muam phauj txiv dab laug, cuas nyab cuas ntxhais, kev neej kev tsav tuaj nrog hlub thiab tuaj nrog txheeb nws kev khwv iab khwv daw raus nws laus thiab cov tseem ua neej nyob tom qab kom tsis txhob muaj kev tu siab. Tuaj lis kev noj kev haus, kev tsis haum xeeb los yog kev cov nyom ntawm lub ntees kom tus tag sim neej ntawv tau ib lub zoo ntees.

• Txiv Hleb Txiv Ntoo:

           Thaum ib tug neeg tag sim neej lawm yuav tau muaj ib tug ua tus coj cov kwv tij los yog thov kev neej kev tsav mus pab txua lub hleb los rau tus tuag. tus no thiaj muab hu ua txiv hleb los yog txiv txiag.

• Txiv Tshwj Kab thiab Niam Ua Mov:

           Thaum ib tug neeg tag sim neej lawm yuav muaj kwv tij, kev neej kev tsav, phooj ywg thiab lub teb chaws yuav tuaj nrog nta nws lub ntees kom zoo. Yog li ntawv, tsev neeg yuav muaj kev noj haus rau tsoom neeg suav daws tuaj nrog nta dab nta qhua thiaj li yuav tau thov cov txiv tshwb kab tuaj ua zaub ua nqaij, cov niam tuaj ua mov thiaj tau noj.

• Txiv Coj Xai:

           Yog muaj ib tug tag sim neej es tso txij nkawm tseg, tso tub ki coob rov tom qab, cov tub ki yuav thov kom tus txiv coj xai no tuaj ua lawv niam/txiv lus foom ib co lus zoo rov rau cov tub ki kom lawv ua lub neej nrog luag tau nom tau tswv, tau noj tau haus, tau koob tau hmoov zoo los ntawm tus laus los.

Tso Plig

Yog ib tus twg tag sim neej puv ib tsug kaum peb hnub yuav tau hu nws los daws nws lub kauj vab kauj le ( qhov nov yog muab lub vab los sawv tam nws lub cev thiaj hu li ntawv), daws nws tej suab qeej suab nruas, suab quaj suab nyiav, tej mob tej ntsaj ntawm nws tes taw, kom nws lub cev sib li yuj sib li yiag nws tus ntsuj plig tau kev mus cuag nws poj nws yawm thiab mus thawj thiab ua dua ib tug neeg tshiab. Nws thiaj tsis rov los looj koov cov tseem ua neej nyob tom qab. Sawv daws thiaj tau txoj kev noj qab nyob zoo. Yog ua neej xws luag thiab khoom ces 13 hnub xwb tso plig tau lawm, yog ua tsis xws luag tsis tau muaj thiab tsis khoom los mam tso tom qab los tau ib yam.

Qaib Cawv, Npua Cawv Thiab Nyuj Dab

Vim yus niam thiab txiv yog tus muab txoj sia, roj ntsha, tsim yus cev nqaij daim tawv, muab siab ntsws, muab dag zog rau yus, tu da quav da zis, muab caj npab los ua yus lub tog rau ncoo, muab ncej qab los ua yus lub tog zaum, noj ib dia pub ib dia rau yus noj, tu yus hlob, qhia yus hais nkwg mus txog rau thaum yus mus kawm txawj kawm ntse, cob qhia yus mus ua liaj ua teb, ua noj ua haus, hlub yus kom hlob tiav hlaub tiav ces, mam yuav poj yuav sev rau yus, pab kom yus muaj ib lub vaj lub tsev nyob, muaj me tub me nyuam, thiab muaj lub neej nrog luag ua mam tso yus ua yus neej.
Yog li no, tus niam txiv muaj txoj hmoo zoo nyob ntev tau tej tub lub dag lub zog noj. Tej tug tsis muaj hmoo tsis nyob ntev tsis tau lawv lub dag zog noj. Thaum tag txoj sia, tus muaj txoj hmoo ces tau lub zoo ntees, ho tus tsis muaj hmoo ces tsis tau lub zoo ntees. Tej laus tuag mus lawm, tus ntsuj plig nyob txom nyem li cas los muaj. Yog li ntawv, luag thiaj ua huab ua cua, ua npau suav los rau cov tub tom qab kom ua nyuj dab thiab muab xyab ntawv mus rau lawv mus ua tej laus tau muas noj tau siv.
Tus qaib cawv thiab npua cawv  mas yog tej laus yuav los yuav tus nyuj dab es yus tseem ua lub neej nyob txom nyem es yus ua ob tug no thov tej laus kom lawv ncua me ntsi tso mus tu tau nyuj tso mam los ua nyuj dab rau.